Premio Nacional do Cómic 2012

Premio Nacional do Cómic 2012

O asturiano Alfonso Zapico, premio autor revelación de 2010 no Salón Internacional do Cómic de Barcelona, mergullouse durante 3 anos no proceso de creación de Dublinés, unha novela gráfica centrada na vida de James Joyce na que percorre os momentos, conversacións, penurias e aventuras coas que se foi construíndo unha das grandes figuras do século XX e polo que gañou o Premio Nacional do Cómic 2012, promovido polo Ministerio de Cultura.

Cun arduo traballo de documentación e de plasmación en viñetas, este relato, salpicado de múltiples anécdotas, é ademais unha cativadora viaxe en tren por aquelas cidades –Dublín, Trieste, París e Zúric– polas que foi deixando o seu rastro de vida este irlandés universal. Ilustres autores van desfilando polas súas páxinas como Henrik Ibsen, W. B. Yeats, Ezra Pound, H. G. Wells, Bernard Shaw, T. S. Eliot, Virginia Woolf, Paul Valéry, Marcel Proust, Ernest Hemingway, Samuel Beckett, Sergéi Eisenstein, Henri Matisse, André Gide, Lle Corbusier, e ata Lenin.

Xa quedaba claro que a Zapico non lle asustaban os retos, a priori complicados, cando con Café Budapest (Astiberri, 2008) decide meterse de cheo nunha ficción determinada polas orixes do aínda non resolvido conflito palestino-israelí. Acto seguido, tras caer fascinado pola figura de Joyce, este autor da Conca Mineira dá saída a un metódico plan a partir dunha viaxe pola vella Europa que lle permite tomar innumerables apuntamentos de campo e desenvolver un preciso labor de documentación, incluíndo múltiples entrevistas con contrastados estudosos da vida e obra de Joyce, que lle posibilitan dar brillo e entidade crecentes ao proxecto de Dublinés.

En realidade o achegamento a Joyce é dobre, xa que un caderno de viaxe, O roteiro Joyce (Astiberri, 2011), relata a particular aventura de Alfonso Zapico no proceso de xestación de Dublinés e o seu percorrido polas cidades que visitou tras os pasos de James Joyce no seu arduo proceso de documentación e investigación, que lle levou tamén a outras cidades como Bilbao ou Angoulême.